如果「旅行學」有考試 香港人一定攞 A

▲ 相片來源：Nothing Serious fb

「去玩去巔」人人想，香港人最鍾意去旅行，小編都想學翠如BB 走過浮華大地，旅行乜乜乜。不過，香港人有「獨特的旅行技巧」。以下5種香港人旅行學，你中了多少項？

1. 早半年拎假   紅日計到盡

在機票平過澳門船票的今日，只要你每天緊貼「又飛啦」的資訊，只要你肯捱眼訓，兼且手指夠靈活，就可成為鍵盤戰士，不斷按「F5鍵」，直至搶到廉航機票，300元來回台灣絕不是發夢。

平機票通常都有條件限制的，就是「話飛就飛」，又或者好像買「樓花」一樣，等大半年後才出發。假如順利買到張在紅假出發的機票，別開心得太早，建議大家還是提早回公司截住老細，同隔離那位阿姐鬥快「mark」假，否則隨時功虧一簣。

2. 爭分奪秒  去旅行好似打仗

總有一種人，去旅行好似打仗一樣。

同事Tiffany永遠不用主動說自己去旅行，但全世界人都知道她快將出發，因為她會問遍所有同事借旅行書，然後不停霸住公司的影印機影印再影印。

Tiffany手執一大堆行程，然後軍事家上身一樣，告訴同行的朋友A「一落機我們即刻搭車去食築地，再去行街......」

朋友A問：「唔駛返酒店？行李點算？」Tiffany即刻答：「行李跟身啦，酒店下午先check in，唔通浪費時間等？」

朋友A O哂咀，向其他同事訴苦，同事們淡淡然說：「係呀，Tiffany去行程好緊密。坐下食飯？No Way，佢係車上咬個包就可以了。上年去歐洲，佢為了慳一晚酒店，特登揀晚上搭Euro Star，在火車上睡覺。」

去旅行都要衝衝衝，香港人，輕鬆啲啦！

3. 恨不得把整個日本、韓國搬回香港

Ａ同事：「你下個星期去韓國？幫我帶50塊蝸牛面膜回來啦！」

B同事：「依隻面膜好好用？咁你都幫我買20塊啦！另外仲有個隻眼霜，要3 Set，韓國買抵好多！」

只要你任何一個朋友知道你將到日韓旅行，你注定要變身「咕喱」，幫朋友抬面膜回港吧！

不過，正所謂「有口話人，冇口話自己」。小編又何嘗不是每次到日本，都會失控購物？

但你又不能怪自己，日圓低見6算多，撞正百貨公司大減價，試問怎可忍手？銀聯碌卡再有折，買一件日本衫，香港要3、4百元，日本買隨時100元有找。小編真的好想把整個日本、韓國都搬回香港！

4. 將旅行書當天書

每次去書局，擺在當眼位置通常都是旅遊書，還有成堆人企定定「取經」。對於不少港人而言，旅遊書等於「天書」，那些景點好玩、那些餐廳食物好吃，總會跟到足，簡直是一書在手，永無煩憂。

5. 旅行照fb曬命

香港人去旅行，「相機食先」是常識吧，旅途上遇到不快事情、跟同行旅伴嗌大交？沒關係，最重要是識得在fb或ig報喜不報憂。

點樣表達出美滿旅程？一定是po旅遊拼相！而且相格愈多愈好：景點拼9格、早午晚餐拼12格、戰利品拼7格，自信十足的，還會無限拼自己的旅行look：「三七分面」、背影、飲咖啡照及自拍等等。

想更「呃like」，玩埋美圖秀秀潤飾一下張相，加1、2句曬命caption：「I miss Japan!」、「New York I will be back!」無得輸。

實不相瞞，小編每次旅行都想整個日本帶回來，行李超重要加錢在所難免，但最怕侶伴是打仗軍訓型，這實在太可怕了。

如果大家有同感，可留言分享你的「旅行出征」經驗吧！

漫畫由Nothing Serious繪畫，獲作者授權轉載。